главная     либерея     теория     студенту     ссылки     поиск  

ДОМОСТРОЙ
Сильвестровская редакция
(продолжение)

Древнерусский вариант

34. По вся дни жене с мужем о всем спрашиватися и советовати о всем и как в люди ходити и к себе призывати и з гостьями что беседавати
     А по вся бы дни у мужа жена спрашивалася и советовалася о всяком обиходе и воспоминала что надобет а в гости ходити и к себе звати ссылатца с кем велит мужь а гостьи коли лучится или самои где быти за столом сести луччее платье переменити, отнюд беречися от пьяного пития пьяныи мужь дурно, а жена пьяна в миру не пригоже, а з гостьями беседовати о рукодельи и о домашнем строении как порядня вести и какое рукоделеицо здети чего не знает, и того у добрых жен спрашиватися вежливо и ласково и кто что укажет на том ниско челом бити или у собя в подворье у которои гостьи услышит добрую пословицу, как добрые жены живут, и как порядню ведут и как дом строит и как дети и служок учат, и как повинуются им во всем, и то в ceбе внимати, а чево доброво не знает, ино спрашиватца вежливо, а дурных и пересмешных и блудных речеи не слушати и не беседовати о том, или в гостях увидит добрую порядню или вь естве или в питье или в каких приспесех или какое рукоделье необычно, или какая домашняя порядня где хороша, или которая добрая жена и смышленая и умная и в речех и в беседе и во всяком обиходе или где слушки умны и вежливы и порядливы и рукоделны и ко всякому добру смышлены и всего того добра примечати и внимати чево не знает или чево не умеет и о том спрашиватися вежливо и ласково и о том бити челом и пришед на подворья то все мужу сказать на упокои, с такими то з добрыми женами пригоже сходитися ни ествы ни пития для добрыя ради беседы и науку для да внимать то в прок себе а не пересмехатися и ни о ком не переговаривати и спросят о чем про кого иногды и учнут пытати ино отвещати не ведаю аз ничего того и не слыхал и не знаю, и сама о ненадобном не спрашиваю, ни о княинях ни о боярынях ни о суседах не пересужаю.

     

35. Слуг наказывати как в люди посылать с чим
     А слуг своих заповедываи о людех не переговаривати, и где в людех были, и что видели недобро тово дома не сказывали бы а что дома деется того бы в людех не сказывали, о чем послано то и паметуи а о ином о чем учнут спрашивати того не отвечеваи и не ведаи и не знаи того борзее отделавшися да домои ходи и дело кажи, а иных вестеи не приноси што не приказано ино промежь государеи никакои ссоры не будет и неподобные речи и блудные, то бы отнюд не было то доброму мужу похвала и жене, толко у них таковы служки вежливы а пошлешь куды слушку или сына и што накажешь говорити или што зделати или што купить и ты вороти да спроси ему што ты ему наказал что ему говорити или что ему зделати, или что ему купити и толко по тъвоему наказу тебе все изговорит ино добро а пошлешь с слугою к кому еству или питье или что ни буди, да воротив спроси его куды несет толко так скажет как наказано то добро, а посылати питие вполне, а еству целу ино солгать не умееть, а товар посылаи сметив или смеряв, а деньги счетши а што весовое свесив а всево лучши запечатав ино безгрешно да о том наказывати что послано без государя отдать ли, или домов отнести и о тех всех людех не догадается государь или государыня сына или слуги воротит да спросит куды и с чим послали и что наказали и умная слушка вежливая сам воротся да вежливенко соимя колпак, у государя или у государыни спросив о всем переговорит что наказано толко по тому ино добро а куды пошлют в добрые люди у ворот легонко поколотит а по двору идешь и о ком спросит каким делом идешь ино того не сказывати а отвечать не к тебе аз послан, к кому аз послан с тем то и говорить а у сенеи или у избы или у кельи и ноги грязные отерти нос высмаръкати и да выкашлятся, да искусно молитва сотворити, а толко аминя не отдадут ино и в другое и в третие молитва сотворити поболши перваго, а ответа не отдадут ино легонко потолкатися и как впустят ино в ту пору носа не копать перстом ни кашлять ни сморкать вежливенко стоять и на сторону не смотрить до что наказано то исправит а о ином ни о чем не беседовать до борзее к себе поити до тот ответ государю сказать о чем посылан а где лучится быти у кого в подворье или в кельи при государи или без государя никакои вещи ни доброи ни худои ни дорогои ни дешево не ворошити ни смотрети бес прошения ни с места на место не переложити, и с собою возмя ничево не вынести без благословения а ествы и пития також не покушати чево не ведено то святотатьство, и лакомъство кто на то дерзает без благословения и без веления тому ни в чем не верити и заочи его никуды не пошлют по Еуаггелию в мале бе верен надо многими тя поставлю а что куды послано покрыто, или повязано, или запечатано или заверчено того не дьвигнути и не посматривати ествы или пития что послано того не покушивати каково послано таково и отнести, толко туто осмотрити как дают цело ли и вполне ли посылают чтобы там неверки не было куды то нести.

     

36. Женам наказ о пьяньстве и о пьяном питии, и слугам тако же и о потаи не держати ничево нигде и слуг лжи и клеветы не слушати без исправы как их наказывати грозою и жену тако же, и как в гостех быти и дома себя устроивати во всем
     А у жены бы отнюд никако же никоторыми делы питье не было ни вино ни мед ни пиво ни гостиньцы, питие бы было в погребе да на леднике пила бы безхмелную, брагу и квас и дома, и в людех, аще приидут отколе жены о здоровъи спросить, тем пития пьяного не давать, а свои женки, и девки не пили же бы в людех и дома допьяна, а жене втаи мужа своего не ести и не пити, и похоронак на еству и на питье, потаи мужа своего не держати, а у подруг и у племяни потаи мужа своего питья и ествы и зделки и поминков всяких не просить и самои не давать а у себя чюжево не держать без мужня ведома, о всем советовати с мужем, а не с холопом и не с робою отнюд беречися от всякаго зла а раб своих и рабынь ложьными словесы не обговаривати мужу своему и насердки не держати а кто что избродит и то мужу сказати прямо бес прибавки а мужу и жене отнюд оговору не слушати никаково и не веровати без обыску, без прямого а жене к мужу безлепиц домашних не доносити чего сама не возможет управити а которое дурное дело то мужу сказати в правду а в чем которая женка или девка не слушает и слово и наказание неимет ее, или какову пакость учинит о том о всем с мужем переговорити каково кому наказание учинити, а гостьи коли лучатся и их почтивати питием как пригожа, а самои пьяново пития хмелново не пити а питие и еству и всякои обиход приносит один человек сверстнои кому приказано а мужеск пол туто и рана и поздно отнюд никако же никакими делы не был бы, кроме того кому приказано сверстному человеку что принести или о чем спроситца или о чем ему приказати, и всего на нем пытати и безчиния и невежества, а иному никому тута дела нет, а завтракати мужу и жене отнюдь не пригоже кроме немощи, ести и пити в подобно время.

     

37. Как платья всякое жене носити и устроити
     А платья и рубашки, и убрусы на себе носити бережно по вся дни не извалять не изсуслати не измяти и не излити на рудне и на мокре не класти все то снимаючи с себя класти бережно и беречи того накрепко и слуг учити всякому тому наук а самаму государю и государыни и детем и слугам в чем делать то платье ветшано а остряпавши дело ино переменить платно чисто вседневное и сапог, а в празник и в ведро и при людех или к церкви ити или в гости ино лучшее платье надети из утра бережно ходити, и от грязи, и от дожжа, и от снега беречися, и питьем не улити и ествою и салам не извалять, и не иссуслать на руде и на мокре не сести, от празника или от церкви или и из гостеи пришед лучшее платья с себя снем пересмотрить, и высушить и вымять и выпахать и вычистить да хорошенько укласти да упрятать, а и ветшаное и вседневное всякое платно, и верхнее и нижнее и белое и сапаги все измыто всегда бы было, а ветшаное исплачено и исшито, ино людем посмотрити пригоже и себе мило и прибылно, и сиротины дать ино спасенья, платья всякое и рубашка и убрусы и ширинки и всякои наряд и складши и свертев хорошенько положити где ни буди в сундук или в коробью.

     

38. Как избная парядня устроити хорошо и чисто
     Стол и блюда и ставцы и лошки и всякие суды и ковши и братены, воды согрев из утра перемыти и вытерьти и высушить, а после обеда такоже и вечере а ведра и ночвы и квашни и корыта и сита и решета и горшки и кукшины и корчаги також всегды вымыти, и выскресть и вытерть и высушить и положить в чистом месте, где будет пригоже быти всегда бы всякие суды и всякая порядня вымыто и чисто было бы а по лавке и по двору и по хоромам суды не волочилися бы а ставцы и блюда и братены и ковши и лошки по лавке не валялися бы, где устроено быти в чистом месте лежало бы опрокинуто ниц а в каком судне што ества или питие и то бы покрыто было чистоты ради и всякие суды с ествою или с питием или с водою, или квашня ростворить всегды бы покрыто было а в ызбе и повязано от тороканав и от всякия нечистоты изба и стены и лавки и скамъи и пол и окна и двери и в сенех и на крылцы вымыть и вытерть и выместь и выскресть всегда бы было чисто и десницы и нижнее крылце все бы то было измыто, и выскреблено и вытерто и сметено да перед нижним крыльцом сена положить грязные ноги отирать, ино лесница не угрязнится, и у сенеи перед дверьми рогошка или воилок ветшанои положить или потирало ноги грязные отирать чтобы мосту не грязнить в грязное погодье у нижнего крылца сено или солома переменити а у двереи рогозинка или воилок переменити или потирало чистое положить, а грязное прополоскать и высушить и опять туто же под ноги пригодится, ино то у добрых людеи у порядливои жены всегды дом чист и устроен все по чину и упрятано где что пригож и причищено и приметено всегды в устрои как в раи воити всего того и всякои порядни жена смотрила и учила слуг, и детеи добром и лихом не имет слово ино ударить, и увидит муж что не порядливо у жены и у слуг или не потому о всем что в сеи памяти писано ино бы умел свою жену наказывати всяким разсужением и учити аще внимает и по тому все творити и любити и жаловати, аще жена по тому научению и наказанию не живет, и так того всего не творит и сама того не знает и слуг не учит ино достоит мужу жена своя наказывати, и ползовати страхом наедине и понаказав и пожаловати и примолвити, и любовию наказывати и разсужати а мужу на жену не гневатися, а жене на мужа всегды жити в любви и в чистосердии и слуги и дети, тако же посмотря по вине и по делу наказывати и раны возлогати да казнив пожалоти, а государыни за слуг печаловатися по разсужению ино служкам надежно, а толко жены или сына или дщери слово или наказание не имет не слушает и не внимает, и не боитца и не творит того как муж или отец или мати учит ино плетью постегать по вине смотря, а побить не перед людьми наедине поучити да примолъвити и пожаловати а никако же не гневатися ни жене на мужа ни мужу на жену а по всяку вину по уху ни по виденью не бити, ни под сердце кулаком ни пинком ни посохом не колоть никаким железным или деревяным не бить хто с серца или с кручины так бьет многи притчи от того бывают слепота и глухота и руку и ногу вывихнуть и перст и главоболие и зубная болезнь а у беременных жен и детем поврежение бывает во утробе а плетью с наказанием бережно бити, и разумно и болно и страшно и здорова а толко великая вина и кручинавата дело, и за великое, и за страшное ослушание, и небрежение, ино соимя рубашка плеткою вежливенко побить за руки держа по вине смотря на поучив примолвити а гнев бы не был а люди бы того не ведали и не слыхали, жалоба бы о том не была, а по людцкои ccopе или по оговору без обыску без прямого брань и побои и гнев никако же бы не было каково было наношение или речи недобрые, или своя примета того наедине пытати добром истине покается безо всякаго лукавства милостивно наказать да и пожаловати по вине смотря, а толко не виновато дело ино оговорщиком не попущати ино бы вперед вражда не была, а толко по вине и по обыску по прямому а не каетца о грехе своем и о вине то уже наказание жестоко надобет штобы был виноватои в вине, а правои в правде, поклонны главы мечь не сечет а покорно слово кость ломит.

     

39. Аще муж сам не учит, ино суд от Бога приимет аще сам творит и жену и домочатцов учит, милость от Бога приимет
     Аще муж сам того не творит что в сеи памяти писано и жены не учит и дом свои не по Бозе строит и о своеи души не радит и людеи своих по сему писанию не учит и он сам погублен в сем веце и в будущем и дом свои погубит, аще ли добрыи муж о своем спасении радит и жену наказует тако же и домочадцов своих всякому страху Божию учит и законному християньскому жительству яко же есть писано и он вкупе со всеми в благоденьстве по Бозе жизнь свою препроводит и милость Божию получит.

     

40. Самому государю или кому прикажет годовои запас, и всякои товар купити
     Приказному человеку дворецкому или ключнику или купчине на ком вера положена или самому государю всегда в торгу смотрити всяково запасу к домашнему обиходу или хлебнаго всякаго жита и всякаго обилия хмелю и масла и мясново и рыбново и свежево, и просолу, или товары какие привозные или лесовои запас, и всяко товар, со всех земель идет коли чему навоз или коли чево много у приезжих людеи и у християн в те поры и закупить на весь год ино у рубля четверти не дадаст а у десети рублев по тому ж а у закупщика дороже купити двои денги дати, да не любое купишь коли чево нет а надобеть, а которои товар, или запас не портитца вдаль а коли дешево ино и с лишком купить свою нужу исполнить на свои обиход а лишнее в пору продаст коли дорого иногды свои обиход прибылью пролезет так то ведетца в добрых людех и у доброго государя домовитаго и благоразсуднаго своим дозором и добрым науком, а купить у кого что нибудь много или мало у приезжево ли гостя или у крестьянина или у здешнево человека, тopгyи полюбовна а денги плати въручь, а над тем по человеку смотря и по купле и почестку учинишь хлебом да солью и питьем в том убытка нет дружба да впередь познать всегды мимо тебя товару доброго не продаст и лишьнево не возмет, и худово не даст, а за добрую послугу или торговлю самому государю такова гостя или торгового человека или приезжего пригоже почтити напоити накормити добрым словом привечать и ласковым приветом и в такои доброи дружбе во всем прибыток живет великои, а посмотря по торговле и по человеку что чево достоин подаришь его чем то у тебя сугубо будет, а кто тем путем живет первое от Бога греха нет а от людеи остуды a от гостеи похвала во всех землях а в дому все благословеное, а не с клятвою, и носити и пити и ести и милостыня довати ис того ино Богу приятно а души на пользу.

     

41. Себе на обиход купити всякои товар заморскои, и из далных земель
     А бобр у гостя целои купишь или два или три или колько хочешь, да и зделать даш дома на все пригодится и у рубля полтина збудется а тафты косяк или сукна постав или розных поставцов или шелку цветного литра или болши золота, и серебра по тому же, или белки, или всякого запасу коли чему навоз по своему обиходу смотря и по промысълу и по рукоделью и по своеи семьи и по мастерицам и по рукоделником и по своему прожитку, так и покупать, и запасать, коли чево много, и дешево, ино и споро, и прибылно, да толко лучитца мастерок свои портнои и сапожьнои, и плотник, ино во всяком запасе и в остатках и в обресках прибыль будет или к новому портищу остатки пригодятца, или ветчаново починить а ты тово не прикупаешь, а лес и дрова и бочьки и мерники, и скалы, и дубник, и лубья и липняг, и доски и драницы и желобы коли тому навоз в зиме на возех, а лете на плотех, и в лодьях на год запасеш у всего не додашь а у рубля четьверть збудется, а у прасола коли занадобитца не любое купиш, а денег слишком даш, а всякои товар запас коли ему навоз всякому товару, а дешево хоти не надобе а в ту пору купи, и свою нужу исполъниш, а чево запасено слишьком на том денги будут с прибылью.

     

42. О том же коли что купить у кого сел нет и всякои домашнеи обиход, и лете и зиме, и как запасати в год и дома животина водити всякая, и ества и питие держати всегды
     Годовои обиход, домовитому человеку мужу и жене, и у ково поместья, и пашни сел и вочины нет, ино купити годовои запас хлеб и всякое жита, зиме на возех а полтевое мяса тако же, и рыбу всякую, и свежую и длинную осетрину на провес, и бочесную в год, и семжину, и икру сиговую и черную, и которая рыба в лето ставити и капуста, и те суды зиме в лед засекати, и питье запасное глубоко, и покрыв лубом засыпать, и коли надобе лете и тогды свеже и готово, а в лете мясо ести покупати домовитому человеку, купити боранца а дома облупити а овчинки, а боранеи потрох прибыль в столе, потешенье у порядливои жены, или у доброго повара, много промыслу, из рудины ушное нарядить почки начинить лапатки изжарить, ношки яички начинить, печень иссекши с луком перепонкою обертев изжарить на сковороде легкое молочком с мукою сь яички приболтав нальет, а кишечьки яички нальет, боранью голову можжок с потрошком уху нарядит, а рубец кашкою начинит, почечные части сварит или начинив ижжарит, и так делати ино из одново борана много прохладу, а студень на леду держати хорошо что останетца в лете мяса покупать на обиход под росход в пятницу в понеделник в среду на всю неделю купить не додаст у гривны алтына, просолено на леду в два или в три дни, или неделею не испортится а с Семеня дни купи яловицу или колко надобет не вдруг изгодою, коли подешевле и ты тогды больши купиш, мясо соли в год и на провес а потрохом семья сыта во всю осень а на коже да на сале половину возмешь денег, а про себя сало перетопишь, на год с вологою, потрохи голова губы скороньи и мозг, кишки, осердье, ноги, печень, почьки, жонки переделают да кашею сальною ошвариною начинят, а каша бы овсяная, или гречневая, и ячная и иною какою хочеш, а не переядят потрохов осенью, ино в Рожественои мясоед пригодитца, а рубцы и губы и уши и ноги коровьи на студень во весь год пригодитца коли не делаи квашенину всегды прохлад, а свиньи доморощеные в осень бити по тому же полти в год осолити а голова и сало, и ноги, и жолудь, и кишки, и потрох, и спина в осень и в зиму пригодитца, у промышьленово мужа, и у промышьленои жены у доброи порядни во всем спорыня, а всегды прохлад и себе и семье и гостем а не убыточно по што в торг и ты в клеть, а гуси и утки и куры кто дома водит, и толко у воды ино скормит лете ничем, а на год з запасом з даровым, да кто про себя коровы держит, доиные, лете корм на поле а дома всякого корму много у добрые порядни, и лете, и зиме, гуща пивная и бражная, и киселная, и квасная, и кислых штеи и отрубеи овсяных и высевки оръжаные и пшенишные и ячные, и заспу делаючи и толокно и в осень капусту солят и свеклу ставят и репу и морков запасают, и у всего того хряпье и листье и коренье и обресков, и крох и в скатерти и в столе и в веке в хлебном и по полицам, и по чюланом и по залавкам крохи и остатки и обьеди, и домовитая добрая государыня, или ключник доброи, все то обирает и по судом ставит, и тем животину лошеди страдные, и коровы и гуси и утки и свины, и куры, и собаки кормит, ceбе не убыток а приплоду и прохладу много всегды в столе прибыль, и себе и гостю, толко дома родитца куры и яица и забела и сыры, и всякое молоко ино по вся дни празник и прохлад а не в торгу куплено всякие пироги и всякие каши и всякие блины, и трубицы, и кисели, и всякие молока коли чево похотелося, а все дома готова, а сама жена все умеет зделать и слуг научит рядити от токих домочатцов богатеют мужи, а толко у промышленого человека у домовитого, и у доброи жены Бог пошлет приплоду поболши, у сьвинеи или у гусеи, или у курав и у вуток или у коров молока и сметаны масла и сырав, и яиц сами всегда ядят воложно да и людеи кормят и милостыню дают от праведных трудов а от благословеных плодов, а излишнее упродадут ино на иную потребу пригодитца благословленая денешка и на милостыню Богу приятно, а у молода человека или у вдовы только запасу такого нет чем живота накормит, что в сеи главе писано, а коровка доиная есть или в деревни у молода человека не одна есть ино кормит сена изрети да мукою посыпати овсяною или иная какая мякининка лучится, да кипятком облить или елычем облить, да перед собою покормить да и издоит, а самои руки умыти чисто, и платно ветчаное чисто же надеть и воды теплои принести потиралце на плечи принесть и вымя и соски вымыть у коровы, и потиралцем чистым вытерть, и в чистом месте издоить и во всяком бережении, и на мякке держать и корм класть какои лучился, а лошадки, и кобылы по вся дни таким ж кормом християнину в ызбе перед собою покормить ино будет плодовито и служиво, и то им за овса место в телята и ягнята молоды и куры и гуси и свиньи и утки тако же перед собою корми какои корм которои животине пригодитца.

     

43. А толко мужь припасет в год всякого запасу и постного, и тому, устрои
     А толко у мужа в год все припасено, и ржи и пшеницы и овса и гречи, и толокна, и всякие запасы и ячмени солоду гороху и конопли, и в пост всякие ествы переменяяся по вся дни делают сами жена с слугами и семья сыта и прохладна, и гостя употчивают без убытка, а которои ествы будет похочет постнои и то делает масло конопляное и заспа все дома и мука и всякие пироги и всякие блины делает и соцни, и трубицы и всякие каши, и лапши гороховые, и цыженом горох, и зобонец, и кундумцы и варенои, и соковые ествы пироги з блинцы, и з грибы, и с рыжики, и з груздями и с макам и с кашею и с репою и с капустою, и с чим Бог послал, или орешки в соку, и короваицы, а у доброго человека и у порядливои жены толко пасено в пору, коли рыбу свежую купячи иную солит иную вялит иную подваривает иную сушит мелкую иную в муку толчет, в пост во шти подсыпает коли пригоже ино в постные дни про гость и про себя коли свежеи рыбе не быть ино преже в столе ретка хрен капуста росол ставленои, и иные земленые плоды што Бог послал, и икры и вялая рыба, и прутовая и подвариваная, и ухи пластовые и щипаные и подвариваные и всякие потрохи, и хохолковые и из немецких селдеи, и из вандышев, и в росоле и в пирозех, и в каши, и яглы и всякои снет, и всяких еств постных у доброи порядни много, а все Бог послал дома, ничего в торгу не купиш, а брусничная вода и вишни в патоке, и малиновои морс и всяки сласти, и яблока, и груши в квасу, и в патоке и постелы, и левашники себе и про гость, и за немощь всегды есть толко в пору припасено, а нужному и болному и родителнице, и заежжему человеку даст ино велия мзда от Бога, а которои рыбы нет в запас, или запас придержалъся, и бочка самому не изоидет купити прибав товарыща или два бочку осетрины или белужины, или селдеи, или какои ни буди рыбы, или осетрины купить вместе, или икру всякую, у рубля пяти алтын не додаш, а не будет в запасе чево, а гостя для и про себя что понадобится купить и того в торгу не добудеш, а и добудеш не в пору и ты, втридорога а не милои кус.

     

44. О запаснои прибыли впередь
     А у доброго человека и у доброи жены у порядливои, и у смышленых и у разумных и у благоразсудных, и у благобоязнивых людеи и у годового у всякого запасу, и у рухляди и у питья и у ествы и у хлебново и у воложново и у мясново и у полтявого и у рыбного и у ветчины, и у солонины и у вялого, и у ветренего, и у просолу, и сухари и мука и толокно, и инои запас, и мак и пшено и горох и масло, и конопли и соль и солод и хмель и мыло и зола и всякои запас чему мочно вперед быти в бережении и не згноено у всякого бы году во всяком обиходе и в запасе сходилося выном году чево не родилося или дорого ино тем запасом как даром проживет, а нужного и болново и недостаточново ссудит, и подможет кому как пригоже, а коли чево изообилно запасено в дешевую пору, ино в дороговлю и продаст, ино сам ел и пил даром, а денги опять дома доброго человека и доброи жены николи ни в чем меженина не имет, а старои запас держать на много лет кои не портятся.

     

45. Огород и сад как водить
     А у которого человека огородец есть, и кто пашет огород сам ли государь дозирает или государыня или кому приказано, первое городба перекрепити, чтобы в огород собаки ни свиньи, ни куром ни гусем ни уткам и всякои животине взоити не имут ни с чюжево двора, ни с своего, ино яблоням и всякому плоду пакости нет, а с суседы остуды толко от тобя твердо твоеи животине к ним не уметь, а их к тебе а двор бы был потому же везде бы крепко горожен или тынен, а ворота всегды приперты, а к ночи замкнуты а собаки бы сторожливы, а слуги бы стерегли же, а сам государь или государыня послушивают ночи, а огород всегды бы был замкнут да кому приказано тот бы его всегды берег и день и ночь и в нем всегда дозирал, да как гряды копати весне, и навоз класти а навоз зиме запасати, и к садилом на дыни варовые гряды готовить, и всякие семена водить у себя и посадив или посеев всякие семена, и всякое обилие в пору поливати, и укрывати, и от морозу всегды беречи и яблони подчищати и суша вытирати, и почки разсаживати и пенки и почки прививати, и гряды всякое обилие полоти, и капуста от черьвя и от блохи беречи и обирати, и оттрясывати, а возле тына около всего огорода борщу сееть где кропива ростет и с весны его варить про себя много, и тово в торгу не купить и нужному даст Бога ради, а толко у молода человека ино и продаст, на иную вологу, а как насадит капусты и свеклы и поспеет листье капустное варить и как учнет витися в клуб и толко часта, ино изретка секучи варити, а листья обламываючи животина кормить, а в ту пору и до осени борщ режучи сушить ино всегда пригодится и в год и в даль и капусту все лето варить и свеклу а в осень копусту солити, а свеколнои росол ставить а огурцы солить ж а летом прохлажаетца ест дыни стручье морковь огурцы и всякои овощ, а Бог послал поболши чево пригодилося ино и упродаст а сад развадити про себя, ино прививка от древа до древа по три сажени и болши ино яблони ростут велики обилью и всяким овощем не помешает ростет а как будет густо от ветья по деревием не растет ништо ино борщу насеяти ино всегды плод а падушок яблочных и што поспело, огурцы и дыни, и всякои овощь в пору бы обирати што про себя сьесть, или поблюсть или в год что поставить или что осолит, или в квасы ставить яблока и груши или в патоке и ягодныи, и вишневои морс а в дешевую пору и грибы сушить и грузди и рыжики солить, и всякои овощь в год ставити или чево упродати, что бы все было убережено, а семена бы всякие у собя водить ино велика прибыль в торгу тово не купишь, а будет слишкоъ, и ты и продаш.

     

46. Как человеку запасное питие держать про себя и про гость, и как устроити то при людех
     А коли одинакои человек а не богатои и запасистои держит про гость пивцо в запасе переварки на марте сварив ячнои и подсытив, а обычное пивцо есть же, а медку разсытить к празнику и вдаль поблюдет в леду засечено медок и мартовское пивцо, аще коли празник или именины или свадба или родины или крестины или по родителех память или лучится гость изневесть любо приежеи любо званои или избраннои человек или игумен честнои и одново часу из однои бочки в пять оловеников меду нацыдят или по людем смотря в бочечки малые да запаснаго мушкатцу в мешечке, а гвозьдики в другом мешечке дерьжит, а в третьем мешечке, всяких благовонных зелеи в печи подварив в оловеники покласти, или в бочечки в горячее вино а вишневого морсу и малинового два оловяника а в ынои патоки готовои, ино в одночасье шесть медов про гость да два вина да вишневого морсу и в переварку в оловеничек поддаст ино дъва пива и кто з запасом живет, и у порядливои жены ества запасная же, ино всегды гостя не сором хотя пир нужново чево прикупит ано дал Бог всего дома много.

     

47. Тому же пивовареннои наказ как пиво варить и кака мед сытити и вино курити
     А в пивоварнюю поварню на пиво, и на брагу и на кислые шти солоду и муки и хмелю отдать то бы было все в письме и смерено и счете, а коли пиво затирают ячное или овсяное или оржаное или хмель парить и у квашенья и у сливаныя дозирати самому все бы было бережно и чисто и не раскрадено и не испрокужено, и за посмех не выпить а коли пиво варят, ино отварив пиво, и силен толко солод ино бочку и болши другово пива нарядят а после всякого пива водою на гущу поливают воды взогрев ведр с тритцать и с сорок на ячную гущу и пятьдесят и шестьдесят взогрев взлити и больши по вари смотря, и тот исъток приквасить добре хорошо семъе пити, а ис первого последу приквасив на кислые шти пригодится, а уксус ставити из доброго сусла, и в береженье и в тепле держати, и в чистоте приходити к нему а хмелины пивные копити на винную в перепуск, и брежно держати а на то ветшаные суды пригожаются, толко бы было в запасе да и перекреплены, а мед сытити самому а как кишет хоромина та запечатати, самому толко назирати, и хто бы тут не ходил, а сливати самому же а на сливанье бы не пили же, а вино курити самому неотступно же быти или кто верен прямо тому приказати, и у перепуска по тому же да смечать по сколку ис котла араки первои и другои, и последу уточат, а у перепуску по тому же смечать колко ис котла укурит первого и середнего и последу, и на погреб и на ледник и в сушило и в житницы без собя никакова не пускати, везде самому отдавати, и отмерити и отвесити сколко кому чево даст то все записати.

     

48. У поваров и у хлебников и везде всякои порядни ключнику дозират
     А у поваров бы и у хлебников, и у всяких приспешников была бы вся порядня и котлы и сковороды и горьшки и медные и железные и таганы, и решотки и чюмичи, и корцы все бы было чисто, и цело и извары, все бы было в счете и в писме, а медяное и оловяное в весу а по вся дни у ключника то бы было пересмотрено, чтобы было все по числу, и перекреплено, и вымыто и в суши, и на месте лежало, замкнуто а бочки и всякие суды перемыты и перекреплены и лежало бы в суше и замкнуто.

     

49. Мужу з женою советовати, как ключнику приказати о столовом обиходе о поварне и о хлебне
     По вся дни и по вся вечеры, исправя си долг душевныи, и во утрии встати по звону и после пения мужу з женою советовати, о устроении домовном на ком что положено, и каму которое дело приказано ведати и тому наказати что коли устроити ести и пити про гость, или про себя или ключник по государеву приказу прикажет что купити на обиход и купив что принесут то смети, и правды смотрити, а повару отдаст что варити, и хлебнику, и на приспехи на всякие, по тому же отдаст, а всегды бы то было в памяти что государю сказати, а в поварню, ества мясная и рыбъная и печь и варити отдавати в число колко государь велит, и на колко блюд да испечено и съварено но у повара взяти в число же а на стол всякая ества ставити по государеву наказу по гостем смотря, а хлебеннои приспех по тому же дати в число, и взяти в число же, и всякои ествы что у стола останетца, и цело и едено, и ух и приспеху всякого, а целую еству перебрати а початое о себе, и мясное и рыбное, и покласти, в суды, в чистые, и в твердые и покрыть и в леду засечь, а початая ества и всякие остатки давати на обиход, как по пригожу а целое блюсти про государя и про господарыню и про гость а питье в стол давати по приказу, по гостем смотря и без гостеи, а государыне брага или квас а суды бы всякие столовые и поваренные всегды после стола в горячеи воде перемыть и переполоскать и перетереть и высушить и все собрав счести и устроити з замком где что живет и у ково что на руках, а столовые суды оловяники и братины и ковши и судки столовые всегды беречи и уксусницы перешницы росолники солоницы лошки блюды ставцы, скатерти и фаты, всегды бы было чисто и готово на стол, и стол бы был чист и скамъи и лавки, и избы, и образы на стене уставлены а изба метена и устроена, а уксус и огуречнои росол, и лимоннои, и сливнои все бы было цежено в ситце, и огурцы и лимоны и сливы также бы очищено и перебрано и на столе бы было чисто и скусно а рыба прутовая и всякая вялая, и всякая студень, посная, или мясная, и икра и капуста, очищено, и по блюдом раскладено до стола изготовлено, а питье бы всякое чисто в ситце бы цежено, а ключники бы и повары, и хлебники и всякие стряпчие сами бы к столу при людех устроилися чистенко, а руки бы были мыты чисто во всяко стряпни а всякие суды и всякая порядня у ключника и у всех стряпчих все бы было мыто и чисто и бережно и у государыни и у ее слуг по тому же. А ества и питие на стол понести осмотря чтобы то судно было чисто в чем несешь и ества или питие чисто же бес пороха, и бес пригарины осмотря ставить, а поставя еству или питие да тут ни кашлять ни сморкать отшед на сторону вычистить нос, или выкашлятся ино не скаредно и вежливо.

     

50. Ключнику приказ как пир лучится
     А коли пир болшои ино всюды самому дозирати и в поварне и в хлебне, а за столом ества отдавати приставити добра человека а у поставца у питья и у судов бережнои же доброи человек надобе. А в стол питье подавати по государеву наказу кому што велено а на сторону никому не давати без веления, и как пир минет, и весь запас серебрянои и оловянои и всякие суды ссмотрити и счесьти, и повареннои и хлебнои и ества перебрати и питие созрити, початое дополнивати, а в пир на дворе брежен же человек надобе, всего бы смотрил и берег и домашние всякие порядни не окрали бы чево, и гостя пьяново беречи, чтобы не истерял чево и брань бы не была а как стол отоидет ино суды сметити всякие, и перемыти велети, и всякая ества перебрати мясная или рыбная и студень и ухи и устроити по преже писанному, а коево дни пир тово вечера или порану самому государю пересъмотрити все ли по здорову и сметити, и перепытати у ключника подлинно колько чево съедено и испито и кому что отдано, и кому что послано, и всякои бы росход во всяком обиходе был в ведоме, и суды бы всякие были в счете, и умел бы государю сказати про все прямо куды што розошлося, и куда что дано, и сколко чево розошлося, и толко дал Бог все по здорову и не исьтеряно и не испорчено и ништо, ино государю ключника пригоже почтити, и иных служек по тому же, и поваров и хлебников, которые бережно стряпали а не пили, ино всех прохладит и накормит и напоит.

     

51. Наказ от государя ключнику как ества постная и мясная варить и кормить семья, в мясоед и в пост
     Да и то бы было от государя в наказе ключнику в мясоед какая ества отдавати в поварню про государя, и про домашнеи обиход, и про гость, а в постные дни потому же а о питьи потому ж наказ надобет от государя ключнику, какое питье носити про государя и государыне и про семью и про гость, и то все чинити и делати и отдавати по государеву наказу а о всяком обиходе ключнику государя по вся утра спрашиватися о естьве и о питье и о всяком, обиходе, как государь накажет так и творити, государю с женою о том о всяком обиходе в домашнем советовати, и ключнику наказывати как челядь кормити по вся дни хлеб решетнои шти, да каша с ветчиною житкая, а игда густая с салом переменяя часто мяса как лучится дадут к обеду, а внеделю, и в празники, иногды пироги а иногды кисель а иногды блины, или иная какая ества, а у вужины шти да молоко или каша, а в посные дни шти да каша житкая иногды с соком, иногды с сущь, иногды репня, а у вужины иногды шти капуста толокно иногды росол иногды ботьвинье по неделям по празником к обеду пироги какие, или гуща или яглы или селедавая каша, и что Бог лучит а у вужину капуста росол ботьвинья толокно, а у жен у челяденных и у девок и у робят по тому же, а отрадным людем та же прибавка остатков, столовых государевых и гостиных, а лутчие люди которые торгуют тех государь в стол у себя сажает а коли гости ядят, и они стряпают а после стола едят ествы с прибавкою, и столовых остатков а у государыни мастерицам, и швеям по тому же сама за столом их кормит и подает им от себя, а челяди питие исток пивнои, а в неделю и в празники брага, а торговым всегда брага, а питьем всяким государь жалует или прикажет, а в прохлад и самым пивца дадуть, наказ от государя повару и ключнику или от государыни, варит на семью челяди или нищим скоромную, и постную еству, капусту или натину, или крошиво иссечено мелко, и вымыть хорошо, и уварить и упарити горазно в скоромные дни мяса, или ветчина, или сальца ветчинного положить, забелъки поддать да припарить, а в пост сочком залить или инои какои навары прибавить, да упарить, хорошо или заспицы подсыпать да с солью и с кислы штями, приварить а кашку всякую по тому же уварить и упарить хорошо с салом или с маслом, или селедовую, или с соком, и всякую семеиную еству хорошенько усьтряпати, и хлебы семеиные тако ж месити, и укъвасити, и вывалять хорошо и выпечь, и пирошки семеиные по тому же, и всякую еству хорошенко и чисьтенько устряпать как своя душа любит, и всякои семеинои ествы государыня или дворецкои сам кушает и толко не хорошо сварено, или испечено, и о том бранит на повара или на хлебника, или на женки которые то стряпают, а дворецкои того не брежет ино на него бранить а государыня того не брежет ино мужу на нее бранити как своя душа любит, так служок и нищих кормити ино то Богу в честь, а себе во спасение, да государю или государыне, всегды ззирати, и спрашивати слуг и маломощьных и убогих о всякои нуже, и о естве и о питии и о одежи и о всякои потребе, и о всякои скудости, и о недостатки и о всякои обиходе и о всех тех нужах о них Бога ради промышляти, и попечение имети елико вмесьтимо сколко Бог поможе, от всея душа яко же о своих чадех и яко же о присных аще кто не радит о сем, и не болезнует о сих да будет анафема, а кто сие с любовию от всея душа и брежет и хранит велию милость от Бога обрящет и грехом свободу получит и жизнь вечную наследит.

     

52. В житницах и в закромех о береженьи
     А в житницах бы у ключника был бы всякои запас и всякое жита солод и рожь и овес пшеница, не згноено, и не накапала бы и не навьяло не проточено от мышеи, и не слеглося и не затхло бы ся, а что в бочках или в коробах мука и всякои запас, и горох и конопли и греча и толокно и сухари и ржаные и пшеничные то бы было все покрыто и судно и твердо и не намокло бы и не знило и не затхлося а всему бы тому была мера и счет сколко чево ис села или ис торгу привезут, и записати а что весовое то взьвесити и колко коли отдаст чево на росход, или взаимы и на всякои обиход, или кому государь велит что дати то все записати же и сколко чево зделают то бы было ведомо ж и хлебы и колачи и пиво, и вино и брага и квас и кислые шти и уксус и высевъки, и отруби и гуща всякая и дрожьжи и хмелины то бы было все у ключника в мере и записано а хмель, и мед и масло и соль вешено.

     

53. В сушиле тако же смотрити
     А в сушиле мясо полтевое, и солонина ветреная полотки и языки и прутовая рыба и пласти и всякая рыба вялая, и ветреная и в рогожах и в крошнях, и вандыши и хохольки чтобы было все в счете и в писме сколько чево куплено и вывешено, провялено и положено, и держано бы то брежно и не згноено и не измочено, и не измято, убережено бы от всякие пакости, и всегда замъкнуто.

     

54. В погребе и на леднике всего беречи
     А в погребе и на ледникех, и на погребицех хлебы и колачи, сыры яица забела, и лук чеснок и мясо всякое, свежее и солонина и рыба свежая и просольная и мед преснои, и ества вареная мясная и рыбная студенью и всяи запас естомои, и огурцы и капуста соленая и свежая и репа, и всякие овощи, и рыжики, и икра, и росолы ставленыя, и морс, и квасы яблочные, и воды брусничные и вина флязские, и горючие и меды всякие, и пива сыченые и простые, и брага, и всяго того запасу ключнику ведати, и сколько чево на погребице поставлено, и на леднике и погребе, и все бы то сочтено и перемечено што вполне што не вполне, и перемечено, и записано и сколько чего куды отдаст по приказу государеву и сколко чево разоидетца то бы было все в счете было бы што господарю сказать, и отчет во всем дати а все бы то было чисто и в покрыте, и не затхлося и не заплеснело, и прокисло, а вина фряские и сыченая перевара, и всякое лутчее питье в опришенном погребе за замком держать а сам бы тамо ходил.

     

55. А в клетех и в подклетех, и в онбарех, устроити всякая порядня ключнику по государеву наказу
     А в клетех и в подклетех, и в онбарех устроити по государеву наказу ключнику, всякая порядня платье ветчаное и дорожнее и служне, и полсти, и епаньчи, и кепяники, и шляпы, и рукавицы, и медведна, и ковры и попоны, и воилоки, и седла, и саадаки и с луки и с стрелами, и сабли и топорки и рогатины, и пищали, и узды и оброти, и морхи лысины и похви, и остроги, и плети, и кнутье и вожжи моржовые, ременные, и шлеи, и хомуты и дуги, и оглобли, и миндери, и мехи дымчатые, и сумы и мехи холщовые и припоны и шатры и пологи и лен, и посконь и веревки и ужища и мыло и зола и ветшанои всякои запас и обрески ветшаное и новое, и пълатяные и коженые, и железные обломки всякие, и гвоздье и чепи и замки и топоры и заступы, и всякои железнои запас, и всякая рухледь, и все то разобрати что пригоже в коробьях положити или в бочках иное по гряткам иное по спицам иное в коробех где что пригож то туто и строити, в сусе и в покрыте, от мышеи, и от могра, и от снегу беречи, и от всякия пакости и все бы то было в счете и в писме, сколко чево нового и сколко ветчаного а что попортилося то починивати а всегды бы было готово, всякои запас как попытают а в ынех подклетех или в подсенье или в онбаре устроити сани дровни телеги колеса одры страдные дуги хомуты оглобли рогожи посконные вожжи лыка и мочала, веревки лычьные оброти тяжи шлеи попоны, инои дворовои запас коньскои где что пригоже поставити или положити или повесити, а лутчие сани воз коптана калымага укрыть на подкладках, все бы было брежно в суше з замком, а в ыном онбаре бочки и мерники и цепники высытки корыта жолобы извары корцы сита, решота, фляги и всякая порядня поваренная и погребная, которые бочки и всякое судно попортилося или обручи огнили или свалилися и то велети окрепити, или уторы переделати или дъна поправити, и обручи новые поправити, и обручи новые наколотити все бы то было готово и выпарено и вымыто и высушено чтобы ни гнилью ни плеснью не пахнуло, дрожьжи бы ни хмелины не засушены, ни загнилися как которое судно понадобитца ино бы было готово, а дубник в запасе держати, что починити или зделати, а ветчаная бочка, извара, и выситок донце дощечки бочечные и вечка и всякое судно, все бы было припрятано, а все то ся пригожает на худую потребу, и ты доброво не портиш.

     

56. В сенницах сено и в конюшнях лошади, и на дворе и дровянои запас устроити и всякая животина
     А сеницах бы было сено усътроено и не разрыто и не разволочено по леснице и по крыльцу и по двору не растаскано и всегда бы было обрано и подметено и в ногах и в грязи не затоптано, и не накапало бы, и не навъяло и не гнило, замкнуто а солома по тому же бы была в кровле, и прикладено и обрано и очищено и не разволочено бы и подметено а в конюшне бы дозирати по вся дни сена бы класти в ясли как лошадем сьести и в ноги бы не рыли а соломка под лошади слати, и подгребати, по вся дни перетрясывати, а на воду бы лошади водити брежно, робята бы на них не гоняли, и вываляти, и вычесати, и на дворе из жолоба овсом перед собою кормити, и попонами терти, и покрыти, а лете подкупывати и холодити, а коровам и гусем и уткам и курам и свиньям, и сабакам корм давати и в хлевы солома слати и подгребати, и поити вода ставити, а животине и собакам и куром на то свои суды держати а чистых судов не поганити а по всем службам ходити, вечере, и в ночи и утре, в фонаре бы была свеча с огнем, а в конюшне и у сена и у соломы однолично из фонаря огня не вымати всякия притчи, а бревна бы и дрова и доски и драницы и усечки, и урупки дощаные, и бревенные и всякие устроити в стороне где пригоже а не на дороге а бревна и доски и драницы на подъкладках а толко под кровлею и тово лутче, чтобы в сухе не навьяло и не замокло дрова толко сухи ино топитца хорошо, и служке приступита и взять и понесть ино хорошо и не угрязнено.

     

57. В поварнях и в хлебнях, и в деловых избах устроити деланое
     А в повареных избах и в поваренех и в хлебнех гуща и дробины и отруби всякие и копустное коренье и хряпье, и листье свеколное и репное плюсенье и бражная гуща и винная ис котлов и кисельные ожимны и в поварьне от мяса и от рыбы что очищают и кислых штеи и опара всего тово не метати все то обрати и в ветчаные суды класти которые ни в поварьне и на погребе не пригодятся да ставити то в опричьнеи хоромине и тем страдные лошеди кормити или чем подмешиваючи невеиницы или овсянои муки или сено резаное или чево иного а иное коровам давати и свиньям и гусем и уткам и курам собакам что как пригоже и мукою посыпают и помывки судовые и горшечные и котелные и всякие ествы и пригарины все животине копят животина тем сыта бывает, а и в деревни животине такои корм ссылают же.

     

58. На погребех и на ледникех, и в житницах, и в сушилех и в онбарех и в конюшнях часто государю смотрити
     А на погребех и на ледникех и в житницах и в сушилех, и в клетех, и в онбарех, и в конюшнах, по вся дни вечере в кои любо день пересмотрити самому государю всякого питья и ествы и всякого обиходу и всякого запасу, и всякои рухледи и в конюшне и хлебне и в поварне и в чьем приказе или у ключника или у повара или у хлебника или у конюха всего песмотрити самому по тому чину устроино как в сеи памяти писано и перепытати колко чево есть и всему ли есть мера и счет, и писмо, да все то сметити и згадати самому и сколко чево зделано, и колко чево разошлося и кому что отдано, и все бы то умели сказать именно, иново вечера кълючника иново вечера хлебника, иново вечера пивовара и конюха смотрити и сметити во всем а ключнику туто же быти, и толко везде строино по наказу все зблюдено, и счет соидется и устроено хорошо и счет отдаст подлинно и памятно и прямо ино того за его службу жаловати, а кто небреженьем или истерял или испортил или солгал или покрал ино посмотря по вине наказывати и пеня чинити, а государю или государыне или ключнику или ключнице по вся дни из утра встав всего преже по всему двору у всех хоромов замков пересмотрити а где есть печати ино печатеи и по здорову ино добро, а где худо замкнуто или замок испорчен или не замкнуто или печать испорчена, или худо запечатано, и в ту хоромину, взлезши всего пересмотрити толко тати были ино знать или свои крали или небереженьем худо замкнуто, и о том, по вине смотря и бранить и наказывать, и обыскивати, где хто начевал и што как деялося и по тому управа чинити а в вечере по тому же везде переходити и пересмотрити и перенюхать где огня бы не уронили на погребе и на леднике и в вечере и утре смотрити гвоздье крепко ли прибито не поттекает ли уторами и ладами, и дном где не каплет ли и везде ли чисто и в росоле и не заплесневело и не згнилося и покрыто, и перечищено и перебрано, толко все по здорову в таком береженье ино добро а што не по тому ино по вине смотря наказывать, а в поварнях и в хлебнях и во всяких хоромех и в конюшнях у всякои животины, и в сенникех, у мастеров и у мастериц и у вучеников, и у торговцов и у всяких своих прикащиков всегда всево пересматривати и пытати толко все по наказу ино добро, а не по тому ино наказание по вине смотря по преже писанному, а за доброе устроение и брежение любити и жаловати, всячески доброму бы была честь а худому гроза.

     

59. С слугами государю сметяся во всем по тому их жаловати
     А которои служка в котором приказе бережен и по наказу живет и в службе чисто ходит без хитрости за посмех не отдаст и сам не украдет, а везде ества и питие и всякая ботреба покрыто и не знило и не поплесневело и прокисло и везде подметено и вытерто и не намочено и не налито и не нагрязнено и не насорено и суды всякие чисты перемыты и устроено хорошо и ества остатки всякие перебърано цело и впередь блюсьти про государя и про гость а початое в росход давати и в стол кому что достоино и как ему велено от государя и во всякои службе кто добро и бережно и бесхитросно служит и по приказу чинит и того пожаловати и добрым словом привечати и есьти и пити подати и нужа его всякая исполнити а чево безхитростно или недогаткою или неразумием не гораздо зделал или попортил што и в том словом наказати передо всеми все бы того береглися и вины отдати а в другие и в третие проступит или ленитца и ино по вине и по делу смотря по разсужению наказати и побити доброму бы была честь а худому наказание и всему тому наук а государыня жонок и девак в своем обиходе тако же сзирает и смечает и наказует такоже как зде писано.

     

60. О торговых и о лавочных людех, по тому же счет с ними часто держати
     А которые в лавках торгуют и на домовнои обиход покупают всякую потребу и на всякои запас ино с теми в вечере и на упокои на всякую неделю самому государю надобет смечатися с ними и в приходе и в росходе и в купле и в продаже с тем вечер а с ыным инои вечер а кто бережен и памятен и радит о своем деле и все в счете живет у него и хитрости в нем нет никоторые и прибыточек от него есть и того примолвити и пожаловати ествою и питием и нужа его пополнити во всем а за добро промысл на выимок своим платьем пожаловати а кто безхитростно что учинит или ленив или позно в лавку ходит или спит долго или кто с товаром не ходит к гостем или какое его небрежение и нерадение ино его наказывати и бранити и по вине смотря такова ему и пеня учинити а за добрую службу тех у себя за стол сажати и от себя подавати и жаловати и во всем их беречи а во всякои службе и в домашнем обиходе и в торговле кто ленив и сонълив и крадлив и упьянчив и наказание и побои неимут и тово от дела отставити и по нем работати а кто глуп груб и крадлив и ленив и ни во что не пригодится и наказание ни удар немет ино накормив да з двора не спустить и иные на такава дурака глядя не испортятся.

     

61. Как двор строити или лавка или деревня или анъбар
     Всякому человеку домовитому доброму у кого Бог послал свое подвореице или деревеньку или лавочку в торгу или онбар или домы каменые или варницы или мелницы ино бы было по преже писаному всякои запас куплен в пору коли дешево да везде на дворе всегды у собя смотрити или ключник или кому приказано или тын попортился или городба в поле или в огороде или ворота или замки попортилися или которои хоромины кровля гънила или обетшала или жолобы засорилися все то смывати и мести и жолобы вычищати и перекрывати и перекрепливати кое поветшало или поломилося или прокапало или ветрам подрало или в ызбе в которых хоромех стол лавка или скамъя или печь попортилася или на погребе или на леднике или в мылне или мост и где што ни будь попортилося или порядня домовитая какая ни буди дворовая или какая или поваренная или конюшенная или погребная или всякое платно и сапог все бы было ветшаное поплачено а порченое покреплено а все бы было и твердо и крепко и не згнило и не накапало и не нагрязнено и не намочено и в кровли и в суши и тому подворью и всякому обиходу домовному старости обетшания нет всегды живет внове а печи всегды посматривают внутри и на печи и по сторонам и щели замазывают глиною а под новым кирпичем поплатить где выломалося а на печи всегды бы было сметено ино николи притчи от огня не сътрах и спать на неи хорошо или чево посушить и у всякои бы печи над челом был искреник глинян или железен и хоти и низок потолок ино не страх огня а всегды бы были всякие хоромы чисто метены и сухи и не нагрязнены и не засорены а на дворе и перед вороты всегды после снегу згребено и свожено и сметено а посьле дожжа грязь пригребена и ненадобное пристроено и не насорено и не заволочено а в сушу приметено ино всегды в подворье чисто и сухо и не нагрязнено а метлы и лопаты и всякии запас и всякая порядня по двору бы не валялись все бы было прибрано и припрятано а на дворе и в огороде колодяз бы был а нет колодезя ино бы вода всегды была а лете и по хоромом вода бы стояла пожарные ради притчи а коли избу или мылню топит а вода бы напередь принесена пожарные ради притчи.

     

62. Как дворовое тягло плотит с лавки позем или з деревни подать и должником долг всякои платить
     А всякому человеку с своего подворья или с лавки позем и з деревни и со всякого угодья дани и пошлины и всякого оброку и всяких данеи и всяких государских податеи на себе не задерживати копити не вдруг а платити ранее до сроку и ты без работы живешь и от сроку и от поруки денек не даеш и поминков не носишь и сам не таскаешся а кто на срок всяких оброков и всяких тяглеи не платит а от того откупается и две дани будет ино уже вдвое будет платить и так нерассудные люди живут в роботе и на правежи и в долгу до коньца обнищает а кто живет в росплате и в управе и всяких податеи за собою не клачивает и долгу на себе безлепичново не водит и тот человек всегды без работы живет и свободен и при животе добро и по смерти детем поминок и наделок двор со всем запасом или лавка с товаром или деревня со всяким животом толко ни в кабалах ни в записех ни в поруках ни в каких тяглех ни в каких податех не зорощено а лучится кому денег занять бескобально или в кабалу или закълад или без росту ино бы на срок платит ино и впередь добрые люди верят а хто на срок не платит или росту напередь не уплачивает ино с убытком и со студом платежь и впередь никто не верит.

     

63. Указ ключнику как держать на погребе всякои запас просолнои и в бочках и в кадех и в мерникех и во тчанех и в ведерцах мясо рыба копуста огурцы сливы лимоны икра рыжики грузьди
     Все бы то стояло непочатые и початые сосуды в росоле да пригнетено дощечкою да и каменем тяжелым а огурцы и сливы и лимоны в росоле же бы были а огурцы решеточкою ж пригнетены под камешком легонько а плеснь всегды счищать и росолом дополнивати а которои росол пахнет затхолы и его сливать до свежим дополнивати россоливать да толко которои просол не в росоле стоит ино верхнеи ряд зниет а не в береженье ино испортится а то все в лете все засекати а мясо по времени вывешивати а и в рыбе только дух появится ино перемыв вывешивать же а которая рыба всякая и мясо солено на провес и вывешивати под весну и как выветрело и есть поспело ино от стропа збирати да переносити в сушило да что пригоже вешати а иное в стопу класти а рыба прутовая в рогожи вертет а пласти по полице класти а подпариваная в крошню чтобы ветрь проходил которая как пригоже так дерьжати а о всем о том как беречи в начале писано а в житницах и в закромех и в сушилех всякаго обилия пересматривати притчею которою накапало или навяло или сыро или затлося или поплесневело или слеглося ино то рассыпав на сонце пересушивати или в печех а что попортилося ино то напередь ести и в заим давати и милостыню и нужным а толко много ино упродаст а которои свежеи сухои в береженье стоит ино то вдаль блюсти в питье всякое и меды и пива и морсы и вишьни в патоке и яблока и груши в патоке и в квасу и брусничная вода по тому же кои бочки в леду засечены и те держати вполне а которое питье стоит не вполне ино дополнивати и в леду засекати а толко которое питье тронулося окисло или поплесневело ино то по малым судом растачивати да то борзо изведет а которое свежее вдаль блюсти и вполне держати и яблока и груши и вишни и ягоды то бы было в росоле а плеснь счищать и подсытив доливать и что как пригоже а на леднике полное питье еству к леду засекши держать ино не портитца а платье всякое и тавар которое в полатах и в клетех и в онбарех и в лавках и в сундукех и в бочках и в коробьях и верьхнее и нижьнее и новое и ветчаное дорогое и дешевое и усчины и полотна того всего лете пересматривати и розвешивати и пересушивати и перетрясывати а которое попортилося того починить и нового и ветчаного и опять по старому хорошо укъладывати и держать то в суше и в покрыте и за замком а сено толко накапало или навьяло или сыро или слеглося или затхлося ино его в ведренои день в солнечнои и на ветр выносить ис сеницы да просушить и перетрясть да опять в сенницу скласть а в стогу слеглося или затхлося по тому же розослать и перетрясть и просушить и опять хорошенько сметать да толко таково ино продасть или лошедми кармить да то изводит кое попортилося а много ино продаст а кое доброе ино дале блюсть и в суше покласть и сенницы укрыти.

     

Послание и наказание ото отца к сыну
     Благословение от благовещеньскаго попа Селивестра возлюбленному моему единородно сыну Анфиму милое мое чадо дорогое послушаи отца своего назание рождьшаго тя и воспитавшаго в добре наказании и в заповедех Господних и сътраху Божию и Божественному Писанию изучену и всякому закону християньскому и промыслу доброму во всяких торговлех и во всяких товарех наказану и святительское благословение на себе имеешь и царское государево жалование и государыни царицы и братии его и всех боляр и з добрыми людми водишися и со многими иноземцы великая торговля и дружба есть все ecи доброе получил и умеи еси совершити о Бозе яко же начато при нашем попечении и по нас тако же бы Бог соблюл по тому жити. И законному браку сочтах тебе у добру родителю благодарную дщерь и благословил есми тобя всякою святынею и честными кресты и святыми образы и благословенным стяжанием яко же мню от праведных трудов а в неведании Бог правитель и ныне убо сыну Анфим предаю тебе и поручаю и оставляю Создатели нашему доброму блюстителю Исусу Христу и Его Матери Пречистыя Богородица и Заступнице нашеи Помощнице и всем святым яко же рече Писание подщися дети оставити наказаны в заповедех Господних лучше неправеднаго богатества аще и в праведнем убожестве неже бы в неправеднем богатестве и ты чадо блюдися неправеднаго имения а твори добрыя дела имеи чада великую веру к Богу все упование возлогаи на Господа никъто же надеяся на Христа не погибнет. Прибегаи всегды с верою ко святым Божиим церквам заутрени не просыпаи обедни не прогуливаи вечерни не погреши и не пропиваи павечерница и полунощница и часы в дому своем всегды по вся дни пети то всякому християнину Божии долг аще возможно по времени прибавишь правила на твоем произволении болшую милость от Бога обрящеши а в церкви Божии и дому на правиле и на всяком молении и сам и жену и детеи и домочатцов стояти со страхом Богови молититися и со вниманием слушати отнюд в те поры ни о чем не беседовати ни обзиратися разве ли кия нужда а говорити правило келеиное и церковное единогласно чисто а не вдвое священническии чин и иноческии почитаи те бо суть Божии слуги теми очищаемъся от грехов те имеют дерзновение молитися Господу о гресех наших и Бога милостива сотворят повинуися чадо отцу духовному и всякому священническому чину во всяком духовном наказании а жена тако же в дом свои их призываи молитися о здравии за царя и государя и за царицу и за чада их и за братию его и за сьвещенническии чин и мнишескии и за вся християне и о своем согрешении и о своих домочадцев молебная совершаи и воду бы святили з животворящаго креста и со святых мощеи и с чудотворных образов аще болезьни ради за здрави и маслом свящают и в церквах Божиих тако же твори приходи с милостынею и с приношением за здравие и по родителех преставльшихъся память твори со всякою чистотою и сам воспомяновен будеши от Бога церковников и нищих и маломожных и бедных и скорбных и странных пришелцов призываи в дом свои и по силе накорми и напои и согреи и милостыню даваи от своих праведных трудов и в дому и в торгу и на пути тою бо очищаются греси те бо ходатаи Богу о гресех наших имеи чада истинную правду и любовь нелицемерную ко всем не осужаи никого ни в чем свои грехи рассужаи како избыти их чево сам не любиш того и другу не твори и храни чистоту телесную паче всего да наступи на совесть свою яко же на лютаго врага и возненавиди яко же милаго душетленнаго дъруга хмелного пития Господа ради отверзи от себе пияньство в сем убо недуге и вся злая ражаются обычаи от него аще от сего сохранит тя Господь вся благая и полезная от Бога получиши и от человек чесьтен будеши и души своеи просвет сотвориши на вся добрая дела воспомяни чада апостольское слово не прельщаитеся ни пьяница ни блудник ни прелюбодеи ни содомленин ни тать ни разбоиник ни клеветник ни хищник Царствия Божия не наследят аще которою страстию победился еси чадо или в которое грехопадение впал о сем прибегни к Богу с теплою верою и ко отцу духовному з горкими слезами и плачися о гресех своих и каися истинне еже таковая не творити и заповед отца духовънаго храни и епитемью держи милостив Господь праведных любит грешных милует всех зовет ко спасению и паки храни и блюди себе в християньском житии праведном законе удержи язык свои от зла и устне свои еже не глаголати льсти храни себе ото лжа и от похвалы и от клеветы и сам ни в чем не величаися уничижи себе паче всех человек узриши славу Божию о всякого чадо не презри во всякои нужи памятуи чадо како мы жихом век никто же изыде от дому нашего тощь или скорбен по силе вся потребная всякому человеку Бога ради давано и скорбново словом ползовано аще кому в чем возможно и мы помогали Бога ради и ссужали всячески а нам невидимо Христос изобилно посылал милость свою всяких благих а не помыслихом никогда на зло никому разьве недоразумия а без лукавства чадо люби мнишескии чин и страннии пришелцы всегда бы в дому твоем питалися и в монастыри с милостынею и с кормлею приходи и в темницах и убогих и больных посещаи и милостыню по силе даваи а домочадцов своих одеваи и корми доволно а жену свою люби и в законе живи по завоведи Господни в неделю и в среду и в пяток и в празники Господни и Великии Пост в чистоте пребываите в посте и молитве и в покаянии и во всяких добродетелех законъное жительство в славу Богу и в жизнь вечную а любодеем и прелюбодеем судит Бог да сам чадо что твориши того жену учи всякому страху Божию и всякому вежьству и промыслу и рукоделью и домашнему обиходу и всякои порядне умела бы сама и печи и варити и всякую домашнюю порядню умела и всякое женьское рукоделье знала коли сама все знает и умеет ино умеет и детеи и слуг всему научити и наряжати и наказати во всем и сама бы хмелново питья отнюд не любила и дети и слуги у неи того же любили же а всегда бы жена без рукоделия сама ни на час не была разве немощи а слуги у неи тако же а в гостех будет или у неи гости отнюд бы сама пьяна не была а з гостьями беседа бы была о рукодельи и о домашнеи порядне и о законном християньском житии а не пересмеиваися и не переговаривала бы ни о ком ничево в гостех и в дому песнеи бесовских и всякого срамословия и блядливых речеи и блудных пословиц сама и слуги не говорила и не творила бы того ни у кого бы не слушала и волъхвов и кудесников и всякого чарования не знала бы и в домы не пушали ни мужиков ни женок аще не внимает сего всячески наказуи страхом и спасая а не гневаися на жену а жена на тебе наказуи наедине да наказав примолви и жалуи и люби ея тако же и детеи и домочатцов своих учи страху Божию и всяким добрым делом понеже тебе о них ответь дати в день Страшного Суда аще по нашему наказанию и по сему писанию учнете жити велию благодать от Бога обрящете и жизнь вечную наследите и з домочатцы своими да держися чадо добрых людеи во всяких чинех и ревнуи добрым делом вънимаи словеса добрые и твори я почитаи часто Божестьвеное писание и влагаи в сердце себе на ползу видел еси чадо како в житии сем жихом во всяком благоговении и сътрасе Божии и в простоте сердца и церковном прилежании со сътрахом и Божественным писанием ползуючися всегда и како были Божиею милостию от всех почитаем и всеми любим и всякому и в потребных уноровил и рукоделием и службою и покорением а не гордынею ни прекословием не осужах никого не просмеивал ни укаривал никого ни бранивался ни с кем и пришла от кого обида и мы Бога ради терьпели и на себя вину полагали и тем враги други быша и аще которою виною душевною или телесною согреших пред Богом и предо всеми человеки и вскорь о том плакахся к Богу греха своего и у отца своего духовнаго каяхся со слезами и умилне прощения прося и заповеди его духовныя с любовию хранях яко же повелить ми и аще кто мя в моем прегрешении или в какове невежьстве обличить или кто духовне накажет или кто в посмех поносит мя и укоряет вся сия с любовию приимах и себе внимах аще по делом о всем о сем каяхся и от таковых дел удаляхся Богу поспешествующу ми аще что и не повинно и не по делу молва или поношение или посмех каков или укоризна или ударение во всем в том винихся и не оправдахъся пред человеки Бог сие праведным своим милосердием исправит воспоминах Еуаггельское слово любите враги ваша добро творите ненавидящим вас благословите кленущая вы молите за творящая вам пакости изгоняющая вы биющему тя в ланиту обрати ему и другую и от взимающаго ти ризу и срачицу не возбрани и всякому просящему у тебе даи от взимающаго твое не истязуи аще кто тя поиметь поприще едино иди с ним и две и паки еще воспоминая причастную молитву Господи даждь ми милость ненавидящим мя и враждующим ми и поношающим ми такоже и оклеветающим мя да никто же от них мене ради нечистаго и грешнаго зло некако постражеть ни в нынешнем ни в будущем веце но очисти их милостию своею и покрыи их благодатию своею Благии тем всегда утешах себе не погреших никогда же церковнаго пения от юности своея и до сего въремени кроме немощи ни нища ни странна ни убога ни скорбна ни печална никогда же презрех кроме невидения и в темницы болна и пьленена и из работы должьна и во всяких нужах по силе окупих и гладних по силе кормих работных своих всех свободих и наделих и ины окупих из работы и на свободу попущах и все те роботые наши свободны и добрыми домами живут яко же видиши и молят за ны Бога и доброхотают нам всегда а кто забыл нас Бог его простит во всем а ныне домочадцы наши все свободны живут у нас по своеи воли видел еси чадо мое многих пустошных сирот и работных и убогих мужеска полу и женьска и в Нове городе и зде на Москве вскормих и вспоих до совершена возраста изучих хто чево достоин многих грамоте и писати и пети иных иконного писма инех книжного рукоделия овех серебреново мастерства и иных всяких многих рукоделеи а иных всякими многими торговли изучих торговать а мати твоя многие девицы и вдовы пусътошные и убогие воспитала в добре наказании изучила рукоделию и всякому домашнему обиходу и наделив замужь давала а мужескии пол поженили у добрых людеи и все те дал Боге свободны своими добрым домами живут многи во свещенническом и во дьяконьском чину в дьяцех и в подьячих и во всяких чинех кто чево дородился и в чем кому благоволил Бог быти овии рукодельничают всякими промыслы а многия торгуют в лавках мнози и гоздьбы деют в различных землях всяки торговлями а божиею милостию во всех тех наших скормленикех и послуживцех ни соромота ни убыток никакая продажа от людеи ни людем от нас ни тяжа ни с кем не бывала во всем Бог соблюл по ся места а от кого нам от своих скормлеников досада и убытъки многи и велики бывали ино то все на себе понесено нихто того не слыхал а нам то Бог исполнил и ты чадо тому же ревнуи и тако твори на себе, всякую обиду понеси и претерпи Бог сугубо исполнит не познах другия жены разве матери твоея еже с нею обещахове то и сотворих о Бозе соверши Христе християньски сконьчати живот свои в заповедех Твоих живи чадо по християньскому закону во всяких обычаех без лукавства и безо всякия хитрости ко всем а не всякому духу веруи доброму ревнуи лукавых и законопреступных во всяких обычаех отнюд не люби а законнои брак со всяким опасением храни до коньчины живота своего чистоту телесную храни кроме жены своеи не знаи никого и пьяньственаго недуга такоже берегися в дву сих главизнах вся злая сводятся до ада преисподняго и дом пуст имению тщета и от Бога не помилован будет и от людеи безчестен и посмеян и укорен и от родителю прокълят аще чадо тебя от сего зъла Господь сохранит закон сохраниши по заповеди Господни и от хмелного питья воздержися и во всяких добродетелех поживеши яко же есть богобоязнивии люди и ты от Бога помилован будеши а от людеи честен и исполнит Господь дом твои всякою благодатию и еще воспомянути гостеи приезжих у себя корми а на суседстве и з знаемыми любовно живи о хлебе и о соли и о доброи зделке и о всякои ссуде а поедешь куды в гости поминки не дороги вози за любовь а в пути от стола есть подаваи домовным государем и проходящим и их с собою сажаи за стол и питеица такоже подаваи а маломожным милостыню даваи аще сия твориши то везде тебя ждуть и стречають а в путь провожают от всякого лиха берегут на стану не покрадут а на дороге не розобьют того ради кормят добраго до добро а лихова от лиха тот ся на добро обратит во всем в том убытка нет в добрых людех хлеб соль заемное дело а поминъки такоже а дружба в век а слава добрая а на дороге и в пиру и в торговле отнюдь сам брани не зачни а кто излает терпи Бога ради а от брани уклонися добродетель злобу преодолевает Господь бо гордым противится смирена Бог любит а покореному Бог благодать дает аще людем твоим лучитца с кем брань где ни будь и ты на своих брани а кручиновато дело и ты ударь хоти и твои прав тем брань утолиши такоже убыток и вражда не будет да еще недруга напоити и накормити хлебом да солью ино вместо вражды дружба воспоминаи сыну великое Божие милосердие к нам и заступление от юности и до сего времени на поруку не давал никого ни меня не давывал никто во всяких вещех и на суде не бывал ни с кем ни искивал ни отвечивал а видел еси сам в рукодеях и во многих бо всяких вещех мастеров всяких было много иконники книжные писцы серебреные мастеры кузнецы и плотники и каменьщики и всякие и кирпищики и стеньщики и всякие рукоделники денги и по пети и по десяти и болши а многи были чмуты и бражники и со всеми теми мастеры в сорок лет дал Бог разлезенося без остуды и бес пристава и безо всякия кручины все то мирено хлебом да солью да питьеме да подачею и всякою добродетелью да своим терпением а сам у кого што купливал ино ему от мене милая розласка без волокиды платежь да еще хлеб да соль сверх ино дружба в век ино всегда мимо мене не продаст и худого товару не дасть и у всего не доимет а кому што продавывал все в любовь а не в оман не полюбит хто моего товару и аз назад возму а денги отдам а о купли и о продажи ни с кем брань и тяжба не бывала ино добрые люди во всем верили и зде и иноземцы никому ни в чем не сьлыгивано не манено ни пересрочено ни в рукодельи ни в торговли ни кабалы ни записи на себя ни в чем не давывал а ложь никому ни в чем не бывала а видел еси сам какие великие сплетъки со многими людьми были да все дал Бог без вражды коньчалося а ведаеш и сам что не богатеством жито з добрыми людми правдою да ласкою да любовию не гордостию и безо всякия лжи чадо мое любимое Анфим еже тя поучах и всячески наказывах о всяком добродетелном и богодохновенном житии и грубое сие писание худаго моего учения предах ти молю тя чадо Господа ради и Пречистои Богородицы и великих чюдотворцев почитаи себе с любовию и со вниманием и напиши на сердцы своем и прося у Бога милости и помощи и разума и крепости и вся предиреченная с любовию и делом тако же по сему писанию и жену поучаи и наказуи такоже и детеи своих и домочадцов всех учи страху Божию и добродетелному житию и аще сам вся сия твориши и жену и детеи и раб и рабынь и всех ближних своих и знаемых научиши и дом свои добре устроиши вся благая от Бога обрящеши и жизнь вечную наследиши со всеми одержимыми тобою аще сыну моему моления и поучения не внемлиши и по сему писанию не учнеши жити яко заповеди не начнешь хранити и от богодухновенных мужеи не пользуешися поучением и почитанием святаго Писания и християньскаго праведнаго закона не храниши и о домочатцех своих не радиши яз твоему греху не причастен сам о ceбе и о домочатцех своих и о жене ответ даси в день Страшнаго Суда аще чадо мое возлюбленное и малые сия заповеди худаго моего учения сохраниши и по нашему пути поидеши и словес моих послушаеши и делом творити нашнеши и будеши сын свету и наследник Небесному Царствию и будет на тебе милость Божия и Пречистыя Богородицы и Заступницы и Сергия и Никона и Кирила и Варлама и Александра и всех святых и родительская молитва и мое въчное на тебе благословение отныне и до века и благословляю тебя чада своего и прощаю в семь и в будущем и буди на тебе милость Божия и на жене твоеи и на чадех твоих и на всех ваших доброхотав отныне и до века.

     Чадо мое единородное и любимое Анфим произволил Бог и благочестивыи и православныи царь государь велел послужити тебе в своеи царскои казне у таможенных дел и ныне молю тя чадо и со слезами глаголю Господи ради памятуи царское наказание прося у Бога помощи и разума от всея душа и от всего помышления служи верою да правдою безо всякия хитрости и безо всякаго лукавства во всем государьском другу не дружи недругу не мсти и волокида бы людем ни в чем не была всякого отделаи с любовию без брани а не поспеется и ты добрыме словом отвещаи и присрочив не изволоча отпусти а в торговли прямую розласъку чини душевредная бы тъвоя служба не была государю ни в чем а сам благословленым государьским уроком сыт буди и все бы у тебя государьское было всегда в счете и в смете и в писме и приход и расход и к казначеем буди послушен а с товарищами советен а к подьячим и мастером и к сторожем грозен и любовен и ко всяким людем приветен а победных и скорбных и нужных и полонеников отнюд без волокиды управ и от собя по силе накорми и напои и милостыню даи по человеку смотря а случится суд всякому человеку богату и убогу другу и недругу аще свое дело истинно и праведно без волокиды и без всякия хитрости соверши по Еуаггельскому словеси не на лица судите сынове человечестии но праведен суд судите им же судите судом судится вам и в ню же меру мерите возмерится. Слава свершителю Богу ныне и в век века аминь.
Источник:Домострой. СПб.: Наука, 1994. (Серия "Литературные памятники".)
Электронный источник: http://www.sv-rus.ru
 вывести на печать    найти в теории    вернуться в либерею
 оглавление
 Часть 1
 Часть 2
 смотри также
 версия для печати
 информация
«Домострой» - русский литературный памятник XVI в. Представляет собой тщательно разработанный свод правил общественного, религиозного и в особенности семейно-бытового поведения. Предполагают, что «Домострой» возник в XV в. в среде богатого новгородского боярства и купечества. Автор его пользовался литературными источниками в виде сборников «слов» и поучений («Измарагд», «Златоуст», «Златая цепь» и др.). «Домострой» служил правящему классу нравственным кодексом. В середине XVI в. переработан приближённым молодого царя Ивана IV Васильевича протопопом Сильвестром, который заключил изложение «Домостроя» посланием к своему сыну Анфиму. Содержит ценные сведения о социальном укладе в Русском государстве, даёт подробное описание повседневной жизни родовитого боярства и купечества со множеством бытовых подробностей. Написан в большей своей части живым языком, местами украшен пословицами и поговорками.
 
    наверх
  главная     либерея     теория     студенту     ссылки     поиск  
  
 
историко - литературный портал
  "Древнерусская литература"
             © 2002 - 2003
при поддержке кафедры русской
 литературы и фольклора КемГУ

                             powered by parser3

Необходимые документы для разработки проекта ндс.   /   Препараты, которые дают лучший рельеф вашим мышцам станозолол курс на сайте магазина danabol.com.ua