главная     либерея     теория     студенту     ссылки     поиск  

СКАЗАНИЕ ОБ ИНДИЙСКОМ ЦАРСТВЕ

Древнерусский вариант

     Аз есмь Иоанн царь и поп, над цари царь, имею под собою 3000 царей и 300. Аз есмь поборник по православной вере Христове. Царство мое таково: итти на едину страну 10 месяць, а на другую немощно доитти, занеже тамо соткнуся небо з землею. Есть у мене в единой стране люди немы, а в ынои земли люди рогаты, а в ынои стране люди трепяцдци, а иныя люди 9-ти сажен, иже суть волотове, а иныя люди четвероручны, а иныя люди о шести рук, а иныя у мене земля, в ней же люди пол пса да пол человека, а иные у мене люди в персех очи и рот, а во иной земли у мене люди верху рты великы, а иные у мене люди скотьи ноги имеюще. Есть у мене люди пол птици, а пол человека, а иныя у мене люди глава песья; а родятся у мене во царствии моем зверие у мене: слонови, дремедары, и коркодилы и велбуди керно. Коркодил зверь лют есть, на что ся разгневаеть, а помочится на древо или на ино что, в той час ся огнем сгорить. Есть в моей земли петухы, на них же люди яздять. Есть у меня птица ногои, вьет себе гнездо на 15 дубов. Есть в моем царствии птица финикс, свиваеть себе гнездо на нов месяць и приносить от огня небеснаго и сама зажигаеть гнездо свое, а сама ту тоже сгараеть; и в том же попеле заражается червь, и опернатееть, и потом та же птица бываеть едина, более того плода нет той птици, 500 бо лет живеть. А посреди моего царства идеть река Едем из рая, в той реце емлють драгии камень акинф и самфир, и памфир, и измарагд, сардик и аспид, тверд же и аки угль горящь. Есть камень кармакаул, той же камень господин всем камением драгим, в нощи же свеЬтить, аки огнь горить. Есть у мене земля, в ней же трава, ея же всяк зверь 6егаеть, а нет в моей земли ни татя, ни разбойника, ни завидлива человека, занеже моя земля полна всякого богатьства. А нет в моей земли ни ужа, ни жабы, ни змеи, а хотя и воидеть, ту и умреть. Есть у мене земля, в ней же ражается перець, вей люди по то ходять. Опроче всех есть у нас море песочное езеро, да николи же не стоить на едином месте; отколе ветр потянеть, ино поидеть вал, и восходять те валы на брег за 300 верст. Того же моря не преходить никаков человек, ни кораблем, ни которым промыслом. И за тем морем не ведает никаков человек, есть ли тамо люди, нет ли, и с того моря в нашю землю текут рекы многи, в них же рыбы сладки, и посторонь того моря за 3 дни суть горы высокы, от них же течеть река каменна, валится камение великое и малое по себе 3 дни. Идет же то камение в нашю землю в то море песочное, и покрывають валове моря того и. Близ тоя рекы едино днище есть горы пусты высокы, их же верха человеку не мощно дозрети, и с тех гор течеть река под землею не велика; но во едино время разступается земля над рекою тою, и кто узрев да борзо воскочить в реку ту, того ради да бы ся о нем земля не соступи, а что похватить и вынесеть борзо, оже камень, той драгии камень видится, а яже песок похватить, то великы женчюг возмется. Та же река течеть в великую реку, люди же тоя земли ходять на устье рекы, а емлють драгыи камень четьи и женчюг, а кормять свои дети сырыми рыбами, и понирають в реку ту иныя на 3 месяци, а иныя на 4-ре месяци, ищуть камения драгаго. За тою рекою едино днище есть горы высокы и толсты, не лзе на них человеку зрети. И с тех гор пылаеть огнь по многым местом, и в том огни живуть черви, а безо огня не могуть жити, аки рыбы без воды, и те черви точать ис себе нити аки шиду, и в тех нитех наши жены делають нам порты, и те порты коли ся изрудять, водою их не мьють, вергуть их в огнь, и како разгорятся, ини чисти будуть. Есть у мене во иной стране звезда именем Лувияарь.

     А егда поидем на рать, кому хощем болшеи работе предати, идуть пред мною и несуть ту 20 крестов и 20 стягов. Те же кресты и стязи велици злати с драгими каменми и с великыми женчюги зделани, в нощ же светять аки в день. Те же кресты и стязи идуть на 20-ти колесницах и 6-ти, а у которыя же колесница служать по 100 тысящь конник, а по 100 тысящь пешие рати опричь тех, которыя на нас брашно везуть. А коли пойдем к нарочиту месту на бои, ини несуть пред мною един крест древян, на нем же изображено господне распятие, того ради да быхом поминали господню страсть и распятие. Сторонь того креста несуть блюдо злато велико, на нем же едина земля; на землю зряще, поминает, яко от земля есми создани и паки в землю пойти имамы. А се с другую страну блюдо несуть другое злато, на нем же драгии камень и четеи женчюг, на н же зряще величается наше господьство. Идуть же пред мною 3 проповедници, возгла-шають велиим гласом. Един вопиеть: «Се есть царь царем, господь господом», а другии вопиеть: «Силою крестною а божиею благодатью и помощию». А третий вопиеть умилным гласом, яко от земля есмы сътворени и в землю паки пойти имамы. И пакы же престанем глаголати. О силе же не глаголю, яко же бо рекох.

     Двор у мене имею таков. 5 ден ити около двора моего, в нем же суть полаты многы златыя и сребреныя и древяни изнутри украшены, аки небо звёздами, а покровены златом. И в тои полате огнь не горить; аще ли внесуть, в той час огнь погаснеть. Есть у мене иная полата злата на осмидесять столпов от чистаго злата, а всякий столп по 3 сажени в толстоту, а 80 саженей в высоту. В той же полате 50 столпов чистаго злата, на всех же столпех по драгому камени. Камень самфир имать свет бел, камень тонпаз аки огнь горить. В той же полате есть столпа два: на едином столпе камень, имя ему троп, а на другом столпе камень, имя ему кармакаул, в нощи же светить камень той драгыи, аки день, а в день, аки злато, а оба велики, аки корчаги. В той же у мене полате огнь не горить; аще внесуть, то борзо погаснеть; разве бо той огнь горить, иде же идеть из древа негнеющаго, имя древу тому шлема. Того мира вливають в паникадила и зажигають, ино той огнь горить, и тем миром в которую версту помажется человек, стар или молод, боле того не старается,а очи его не болять.Таже полата выше всех полат. Верху тех полат учинена два яблока златы, в них же вковано по великому каменю самфиру, того ради, дабы хоробрость наша не оскудела. Суть бо 4 камени на столпех того ради, дабы потворници не могли чаров творити над нами. Есть у мене иная полата злата велика, как очима видети, на столпех златых; два велики камени кармакаул в нощи светять в той же полате у мене.

     А обедають со мною на трапезе по вся дни 12 патриархов, 10 царей, 12 митрополитов, 45 протопопов, 300 попов, 100 диаконов, 50 певцев, 900 крилосников, 365 игуменов, 300 князей; а во зборнои моей церкви служать 300 игуменов да 65, да 50 попов, да 30 диаконов, и обедають со мною; а столничають у мене и чаши подають 14 царей да 40 королей, да 300 боляр; а поварню мою ведають два царя да два короля опроче боляр и слуг. Те же цари и короли быв, да прочь едуть, и иныя приежчають.

     А еще у мене лежить апостол Фома.

     Есть у мене земля, в ней же суть люди, очи у них в челех. Есть у мене полата злата, в ней же есть зерцало праведное, стоит на 4-рех столпех златых. Кто зрить в зерцало, той видить своя грехи, яже сътворил от юности своея. Близ того и другое зерцало црляно. Аще мыслить зло на своего господаря, ино в зерцале том зримо лице его бледо, аки не живо. А кто мыслить добро, о осподаре своем, ино лице его в зерцале, зримое, аки солнце. А во дворе моем церквеи 150, ины сътворены богом, а ины руками человеческыми.

     
Источник:Изборник (Сборник произведений литературы Древней Руси). – М.: Худож. лит., 1969. – С.362-368, 746 (прим.) – Сер. «Библиотека всемирной литературы». Подготовка текста «Скзания об Индийском царстве» и прим. Г.М.Прохорова.
Электронный источник: http://ic.asf.ru/~/ppf/drl
 вывести на печать    найти в теории    вернуться в либерею
 смотри также
 перевод
 версия для печати
 информация
Для читателей русского средневековья «Сказание об Индийском царстве», очевидно, играло ту же роль, какую в современной нам литературе играет научная фантастика. Отрывок первой русской редакции «Сказания» сохранился в составе сербской «Александрии». Два самых ранних списка «Сказания» (второй половины XV в.) дают уже вторую его редакцию. Во всех списках «Сказания», за исключением положенного здесь в основу Кирилло-Белозерского, текст речи царя Ивана обрамлен предисловием и заключением...
 
    наверх
  главная     либерея     теория     студенту     ссылки     поиск  
  
 
историко - литературный портал
  "Древнерусская литература"
             © 2002 - 2003
при поддержке кафедры русской
 литературы и фольклора КемГУ

                             powered by parser3

Реальный Город - Актуальные Новости,События Сегодня в Мире   /   воспитание детей http://ladycaramelka.ru/   /   Полезное и интересное для девушек http://clubkrasotki.ru   /   Подробная информация купить диплом вуза здесь.   /   http://radio23.ru/scaners/sdr/