О светло светлая и украсно украшена земля Руськая! И многыми красотами удивлена еси: озеры многыми, удивлена еси реками и кладязьми месточестьными, горами крутыми, холми высокыми, дубровами частыми, польми дивными, зверьми разноличьными, птицами бещислеными, городы великыми, селы дивными, винограды обителными, домы церковьными, и князьми грозными, бояры честными, вельможами многами — всего еси испольнена земля Руская, о прававерьная вера християньская!

      Отселе до угор [*] и до ляхов, до чахов, от чахов до ятвязи [*] , и от ятвязи до литвы, до немець, от немець до корелы, от корелы до Устьюга [*] , где тамо бяху тоймичи [*] погании и за Дышючим морем [*] , от моря до болгар [*] , от болгар до буртас [*] , от буртас до чермис [*] , от чермис до моръдви, — то все покорено было богом крестияньскому языку поганьскыя страны: великому князю Всеволоду [*] , отцю его Юрью, князю кыевьскому [*] , деду его Володимеру и Манамаху [*] , которым то половьци дети своя полошаху в колыбели. А литва из болота на свет не выникываху. А угры твердяху каменыи городы железными вороты, абы на них великыи Володимер тамо не възехал. А немци радовахуся, далече будуче за синим морем [*] . Буртаси, черемиси, веда и моръдва бортьничаху [*] на князя великого Володимера. И кюр Мануил Цесарегородскыи [*] опас имея, поне и великыя дары посылаша к нему, абы под ним великыи князь Володимер Цесарягорода не взял.

      А в ты дни болезнь крестияном от великаго Ярослава, и до Володимера, и до ныняшняго Ярослава [*] , и до брата его Юрья, князя Володимерьскаго [*].