главная     либерея     теория     студенту     ссылки     поиск  

СКАЗАНИЕ О ТОМ КАКО ЯТ БЫЛ КИТОВРАС СОЛОМОНОМ

Древнерусский вариант

     Егда же здаше Соломон святая святых, тогда же бысть потреба Соломону вопросити Китовраса. Осочиша где живеть, рекоша в пустыни далнеи. Тогда мудростию своею замысли Соломон сковати уже железно и гривну железну, написа же на ней во имя божие заречение. И посла же болярина лучшего с отроки и веляше вести вино и мед, и руна овчяя с собою взяша. Приидоша к месту его, ко трем кладязем его, а его туто нет. По указанию Соломоню и волияша в кладязи те вино и мед, и заткаша устия кладязем руны овчьми; налияша же два кладяза вина, а третий меду, а сами съхранишась таино и зряху ис таи, оже прийти ему воды нити ко кладязем. И прииде абие, и приник к воде, нача пити, и рече: «Всяк, пия вино, не умудряеть». Яко же перехоте воды, и рече: «Ты еси вино, веселящее сердце человеком». И выпи все 3 кладязи. И хоте поспати мало, и разня его вино, и уснув твердо. Болярин же, пришед, искова его твердо по шии, по рукам и по ногам. И очютився, хотя крянутися, и рече ему болярин: «Господине, Соломон имя господне со запрещением написа на веригах ныне на тебе». Он виде на себе и поиде кроток во Иерусалим ко царю.

     Нрав же его бяше таков: не ходяшеть путем кривым, но правым, и во Иерусалим пришед, требляхут путь пред ним и по-латырушаху, не ходя бо криво. И приидоша ко вдовицене храмине, и вытекши вдвица и взопи, глаголя, молящися Китоврасу: «Господине, вдовица семь убога. Не оскорби мя!» Он же огну ся около угла, не соступяся с пути, и изломи си ребро. И рече: «Язык мякок кость ломить». Ведом же сквозе торг, и слыша мужа рекуща: «Не ли черви на 7 лет?», и рассмеяся Китоврас. И виде другаго мужа ворожаща и посмеяся. И виде свадбу играющу и восплакася. И видяще мужа на пути блудяща кроме пути и наведе и на путь.

     И приведоша его в двор царев. В первом же дни не ведоша его к Соломону, и рече Китоврас: «Чему мя не зоветь к себе царь?» Реша ему: «Перепил есть вечер». Взя же Китоврас камень и положи на камени. И поведаша Соломону творение Китоврасово, и рече царь: «Велит ми пити питие на питье». Во други же день не зва его к себе царь, и рече: «Чему не ведете мя ко царю, и почто не вижю лица его?», и реша: «Немогаеть царь, им же вчера много ел». Сня же Китоврас камень с камени.

     В 3 же день реша: «Зовет тя царь». Он же умеря прут четырех локот и вниде пред царя, и поклонися, и поверже прут пред царей молча. Царь же мудростию своею протолкова прут боляром своим, и рече: «Область ти дал есть вселенную, и не насытился еси, изымал еси мене». И рече ему Соломон: «Не на потребу свою приведох тя, но на вопрос очертании святая святых приведох тя по повелению господню, яко не поведено ми есть тесати камени железом».

     И рече Китоврас: «Есть ноготь птица мал во имя шамир. Хранит же кокоть детки во гнезде своемь на горе каменнеи в пустыни далнеи». Соломон же посла болярина своего со отрокы своими по наказанию Китоврасову ко гнезду. Китоврас же вда белое сткло болярину, наказа его съхранитись от гнезда: «Яко вылетит кокот, замажи стьклом сим гнездо». Болярин же поиде ко гнезду, оли в нем птенци мали, кокот же бе летел по кормлю. И заложи стклом устие гнезду. Мало же постояша и кокот прилете, хоте влести в гнездо, куренци пискаху сквозе стькло, а он к ним не умеет власти. А си сохранишась в таине. Сохранил бо и бяше не на коемь, и приносе и к гнезду и положи и на стекле, хотя е рассадити. Они же кликнуша, и отпусти. И взем же их болярин приносе к Соломону.

     Бысть же Соломон вопрашая Китовраса: «Почто ся еси расмеял мужу прашащу черви на 7 лет?» — «Видех на нем, — рече Китоврас, — яко не будеть до 7 дни жив». Посла же царь испытати, и бысть тако. И рече Соломон: «Почто еси расмиялся мужю ворожащу?» Отвеща Китоврас и рече: «Он поведаше людем скровная, а сам не ведя крова под собою со златом». И рече Соломон: «Шедше испытаите». И испыташа и бысть тако. И рече царь: «Почто еси плакал видев свадбу?», и рече: «Съжалихси, яко жених тои не будет жив до 30 дни». Испыта же царь и бысть тако. И рече царь: «Почто мужа пияна наведе на путь?» Отвеща Китоврас и рече: «Слышах с небесе, яко верен есть муж той, а достоить послужити ему».

     Бысть же у Соломона Китоврас до свершения святая святых.

     Бысть егда нача молвити Соломон Китоврасу: «Ныне видех, яко сила ваша яко человеческа, и несть вашия силы болши нашия силы, и яко ях тя». И рече ему Китоврас: «Царю, аще хощеши видети силу мою, да соими с мене уже, даи же ми жуковину свою с руки, да видиши силу мою». Соломон же сня с него уже железное и дасть ему жуковину. Он же пожре и простре крило свое, и заверже, и удари Соломона, и заверже и на конець земля обетованныя. Уведаша же мудреци его и книжници, взыскаша Соломона.

     Всегда же обхожааше страх Китоврашь в нощи. Царь же сътвори одр и повеле стояти 60 отроком силным с мечи около. Потому же молвится в Писаних: «Одр Соломонь, 60 отрок храбрых от израилтян и от страны нощны».

     
Источник:Изборник (Сборник произведений литературы Древней Руси). – М.: Худож. лит., 1969. – С.370-375, 746-747 (прим.) – Сер. «Библиотека всемирной литературы».
Электронный источник: http://ic.asf.ru/~/ppf/drl
 вывести на печать    найти в теории    вернуться в либерею
 смотри также
 перевод
 версия для печати
 информация
Сказание о мудром иудейском царе Соломоне и о служившем ему «дивием звере» Китоврасе принадлежит к числу «апокрифических» сочинений — произведений, написанных на библейские темы, но не включенных в Священное писание, «скровных» (тайных) и запретных. Уже с XIV в. на Руси имели хождение специальные индексы «отрёченных» книц в индексах этих значились «О Соломоне цари басни и кощюны и о Китоврас». Происхождение и время проникновения на Русь сказаний о Соломоне и Китоврасе (как и других апокрифических легенд о Соломоне) не установлено. Сходство этих сказаний со средневековой еврейской (талмудической) литературой и некоторые особенности их языка позволяют видеть в них перевод с еврейского оригинала, но был ли этот перевод сделан в Киевской Руси или в южнославянских землях (также знавших «кощюны» о Китоврасе), неизвестно.
 
    наверх
  главная     либерея     теория     студенту     ссылки     поиск  
  
 
историко - литературный портал
  "Древнерусская литература"
             © 2002 - 2003
при поддержке кафедры русской
 литературы и фольклора КемГУ

                             powered by parser3

Все о горном деле http://industry-portal24.ru   /   Электропроводка камаз 5320 стартер на камаз.   /   мужская парфюмерия   /   Заходите на веб сайт о прикладной геологии http://www.geologam.ru/   /   регистрация ООО в компании "Успех"   /   Купить мебель в Минске недорого